काठमाडौँ । नेपाली चलचित्र उद्योगका चर्चित नायक पल शाहको मुख्य भूमिका रहने बहुप्रतीक्षित चलचित्र ‘आबाट आमा २’ आगामी असोज ३० गतेदेखि देशभरका सिनेमा हलहरूमा प्रदर्शनमा आउने भएको छ।
निर्माण पक्षले चलचित्रको अन्तर्राष्ट्रिय प्रदर्शन अन्तर्गत क्रोएसियाको प्रदर्शन अधिकार बिक्री भएको आधिकारिक घोषणा गर्दै चलचित्रको नेपाल रिलिज मिति समेत सार्वजनिक गरेको हो।
आर्या इन्टरटेन्मेन्टको ब्यानरमा निर्माण हुन लागेको यस चलचित्रलाई द्वन्द्व निर्देशक तथा सफल निर्देशक चन्द्र पन्तले लेखन तथा निर्देशन गर्ने छन् । चलचित्रमा नायक पल शाहका साथमा लामो समयपछि रजतपटमा कमब्याक गर्न लागेकी सदाबहार नायिका बिपना थापा, नायक आकाश श्रेष्ठ र लोकप्रिय नायिका मलिका महत शीर्ष भूमिकामा देखिनेछन्।
यो चलचित्र पल शाहको करिअरकै अत्यधिक सफल र ‘ब्लकबस्टर’ चलचित्र ‘आबाट आमा’को आधिकारिक सिक्वेल (भाग २) भएकाले पनि दर्शकमाझ यसको व्यापक पर्खाइ र क्रेज रहेको छ।
निर्माताहरूले नेपाली चलचित्रका लागि सबैभन्दा ठूलो व्यापारिक अवसर मानिने बडादसैँको लामो बिदालाई लक्षित गर्दै चलचित्र प्रदर्शनमा ल्याउन लागेका हुन्। यो चलचित्र दसैँको मुख्य दिन फूलपातीको अघिल्लो दिन (असोज ३०) बाट हलहरूमा लाग्नेछ।
तर, यो बर्षको दसैँ बक्स अफिसका लागि निकै चुनौतीपूर्ण र रोमाञ्चक हुने देखिएको छ। असोज ३० को साता ‘आबाट आमा २’ ले बजारमा एक्लै राज गर्न पाउने छैन। यो दसैँमा दीपक–दिपाको बहुप्रतीक्षित चलचित्र ‘छ माया छपक्कै २’, विराज भट्टको ‘१२ गाउँ २’ र चकलेटी नायक अनमोल केसी स्टारर चलचित्र ‘बाटूलो जुन’ समेत प्रदर्शनमा आउने चर्चा छ।
मल्टिस्टारर र ठूला ब्यानरका चलचित्रहरू एकैसाथ आउने भएपछि ‘आबाट आमा २’ ले हल पाउन र व्यवसायिक रूपमा कडा प्रतिस्पर्धा गर्नुपर्ने देखिन्छ। यद्यपि, अघिल्लो भागको ब्राण्ड भ्यालु र पल शाहको फ्यान फलोइङका कारण निर्माण पक्ष चलचित्रको सफलतालाई लिएर निकै उत्साहित र ढुक्क देखिन्छ।
