काभ्रेपलाञ्चोक । काभ्रेपलाञ्चोक जिल्लाका विभिन्न क्षेत्रमा शनिबार दिउँसोदेखि निरन्तर भइरहेको अविरल वर्षाका कारण रोशी खोलामा भीषण बाढी आएको छ। बाढीको सतह खतराको तहभन्दा माथि पुगेसँगै वि.पि. राजमार्गमा गुड्ने सम्पूर्ण सवारी साधनहरूको आवागमन पूर्ण रूपमा बन्द गरिएको छ।
जिल्ला प्रहरी कार्यालय काभ्रेपलाञ्चोक र स्थानीय प्रशासनका अनुसार रोशी खोलाको तीव्र बहावले राजमार्गका विभिन्न खण्डहरूमा तीव्र सडक कटान सुरु गरेको छ। सडकको जग नै कमजोर भई मुख्य मार्ग नै बग्ने जोखिम बढेको र यात्रु तथा सवारी साधनहरूको सुरक्षामा गम्भीर चुनौती थपिएकाले तत्कालका लागि यातायात ठप्प पारिएको हो। प्रशासनले वर्षा पूर्ण रूपमा नरोकिएसम्म र सडकको अवस्था सुरक्षित नभएसम्मका लागि वि.पि. राजमार्गमा कुनै पनि सवारी साधन सञ्चालन नगर्न कडा निर्देशन जारी गरेको छ।
अहिले पूर्वी नेपाललाई सङ्घीय राजधानी काठमाडौँसँग जोड्ने यो व्यस्त राजमार्ग अवरुद्ध हुँदा सयौँ सवारी साधन र हजारौँ यात्रुहरू बाटोमै अलपत्र परेका छन्। जिल्ला प्रशासन कार्यालय काभ्रेपलाञ्चोकले बाढी र पहिरोको उच्च जोखिम रहेकाले नदी तटीय क्षेत्रका बासिन्दाहरूलाई उच्च सतर्कता अपनाउन र यात्रामा निस्किएका सम्पूर्ण चालक तथा यात्रुहरूलाई आवश्यक सावधानी अपनाउँदै बैकल्पिक मार्गको प्रयोग गर्न विशेष अनुरोध गरेको छ।
