काठमाडौँ । नेपाली कांग्रेस र लोकतान्त्रिक समाजवादी पार्टी नेपालले बारा–२ मा सत्ता साझेदार दल जनता समाजवादी पार्टीका अध्यक्ष उपेन्द्र यादवलाई सघाउने निर्णय गरेको छ।
आइतबार बसेको दुवै दलको वैठकलले वैशाख १० गते हुने उपनिर्वाचनमा बारा–२ मा अध्यक्ष यादवलाई सघाउने निर्णय गरेको हो । आइतबार सानेपामा बसेको केन्द्रीय कार्यसम्पादन समितिको बैठकले यादवलाई सघाउने निर्णय गरेको सहमहामन्त्री जीवन परियारले जानकारी दिए ।
यसअघिको कांग्रेस बैठकले तनहुँ–१ मा गोविन्द भट्टराई र चितवन–२ मा जितनारायण श्रेष्ठलाई उम्मेदवार बनाएको छ। उनले दुई क्षेत्रमा कांग्रेसका र बारा २ मा उपेन्द्र सत्ता गठबन्धन दलका साझा उम्मेदवार रहेको उनले बताए । यद्यपि सत्ता गठबन्धनको अर्को दल जनमत पार्टीबाट शिवचन्द्र कुशवाह पनि बारा २ बाट उम्मेदवार बनेका छन्। हालै मात्र आफूले भनेको मन्त्रालय नभएको भन्दै जनमत पार्टी सरकारबाट बाहिरिएको छ। तर गठबन्धन छोडेकोबारे कुनै जानकारी गराएको छैन।
बारा–२ मा उपनिर्वाचनमा उम्मेदवार बनेका जसपाका अध्यक्ष उपेन्द्र यादवलाई पाँच दलीय गठबन्धनको तर्फबाट लोसपाले सघाउने निर्णय भएको सो पार्टीका कार्यकारिणी सदस्य केशव झाले बताए ।
एमालेले तनहुँ–१ मा सर्वेन्द्र खनाल र चितवन–२ मा रामप्रसाद न्यौपानेलाई उम्मेदवार बनाएको छ। बारा २ मा एमालेले उम्मेदवार टुंगो लगाउन बाँकी छ।
रास्वपाले चितवन २ मा सभापति रवि लामिछाने, तनहुँ १ मा डा. स्वर्णिम वाग्ले र बारा–२ मा रमेश खरेललाई अघि सारेको छ।
