आगामी वैशाख ३० गते हुने स्थानीय तहको निर्वाचनमा नेकपा एमालेले खाता खोलेको छ।
पूर्वी पहाडी जिल्ला ताप्लेजुङको ओलाङचुङगोलामा एक वडाध्यक्ष निर्विरोध भएसँगै एमालेले विजयको सुरुवात गरेको हो। ताप्लेजुङको फक्तालुङ गाउँपालिका वडा नम्बर ७ मा पर्ने ओलाङचुङगोलाका वडाध्यक्ष छेतेन शेर्पा भोटे भएका छन्।
यस्तै सदस्यहरूमा टासी शेर्पा, वाङ्ग्या शेर्पा, फुपुल्हामु श्रेष्ठ र विपना तुम्बाहाम्फे विक निर्विरोध भएका छन्।
गाउँमा एमाले र कांग्रेस दुवै पक्षले उम्मेदवारी दिने तयारी गरे पनि पार्टीगत रूपमा जनतालाई विभाजित नगर्ने भन्दै सर्वसम्मत गरिएको हो।
चीनसँगको सीमावर्ती ओलाङचुङगोलामा एमालेको गाउँ भेलाले नेता छेतेन शेर्पालाई वडाध्यक्ष बनाउने निर्णयसहित निर्विरोध बनाएका हुन्।वडाध्यक्ष छेतेन शेर्पा भोटेका अनुसार गाउँलेहरूले चयन गरेका उम्मेदवार बाहेक यस वडामा अरू कोही पनि व्यक्तिले उम्मेदवारी दिएका छैनन्।
साथै उनीहरुविरुद्ध वडाका कसैले पनि उम्मेदवारी दर्ता नगर्ने सहमति भएको छ। यस्तै डोल्पाको सेफोक्सुन्डो गाउँपालिकामा एमालेका तर्फबाट उम्मेदवारी दिएका अध्यक्षसहित सबै उम्मेदवार निर्विरोध भएका छन् ।
गाउँपालिका अध्यक्ष धावासम्डुक गुरुङ निर्विरोध भएका हुन् । यो गाउँपालिका अध्यक्षमा एमालेका गुरुङबाहेक अरुको उम्मेदवारी नपरेको हो ।गाउँपालिकाका वडा नम्बर १,३,५,६,७ र ९ मा वडाध्यक्षहरु क्रमशः जिक्मेछोइङ लामा,पेमागिर्मे गुरुङ,कार्मातार्के गुरुङ,रिग्जिन गुरुङ,पेमाछिरिङ गुरुङ र सार्के लामा निर्विरोध भएका छन् ।
