काठमाडौँ । आर्थिक वर्ष २०८३/८४ को वार्षिक बजेट संसद्मा प्रस्तुत गर्नुअघि त्यसलाई पारित गर्न आज राष्ट्रिय योजना आयोगको पूर्ण बैठक र मन्त्रिपरिषद्को बैठक बस्दै छ। बजेट पारित गर्न प्रधानमन्त्री बालेन्द्र शाहको अध्यक्षतामा दिउँसो १ बजे योजना आयोगको पूर्ण बैठक बस्ने कार्यसूची रहेको छ। योजना आयोगले बजेटको आकार र कार्यक्रम स्वीकृत गरेपछि त्यसलाई अन्तिम स्वीकृतिका लागि मन्त्रिपरिषद् बैठकमा पेस गरिनेछ।
मन्त्रिपरिषद्को बैठकले अनुमोदन गरेपछि बजेट वक्तव्य संसद्को संयुक्त बैठकमा पेस गर्ने संवैधानिक व्यवस्था रहेको छ। आर्थिक वर्ष २०८३/८४ को पूर्ण बजेट अर्थमन्त्री डा. स्वर्णिम वाग्लेले अपराह्न ४ बजे बस्ने संघीय संसद्को संयुक्त बैठक (प्रतिनिधि सभा र राष्ट्रिय सभा) मा प्रस्तुत गर्नेछन्। नेपालको संविधानअनुसार हरेक वर्ष जेठ १५ गते (गणतन्त्र दिवस) का दिन सरकारले आगामी आर्थिक वर्षको बजेट संसद्मा पेस गर्नुपर्ने अनिवार्य व्यवस्था छ।
मुलुकको आर्थिक सुधार, चालू आयोजनाहरूको निरन्तरता र नयाँ योजनाहरू समेटिएको यो बजेटलाई आम नागरिक र निजी क्षेत्रले निकै चासोका साथ हेरेका छन्।
