काठमाडौँ । माधव कुमार नेपाल नेतृत्वको नेकपा (एकीकृत समाजवादी) र वामदेव गौतमको नेकपा राष्ट्रिय एकता अभियानबिच शुक्रबार एकीकरण हुँदैछ । गत शुक्रबार अभियानका संयोजक गौतम र नेकपा एसका अध्यक्ष नेपालबिच साउन २ गते एकीकरण गर्ने सहमति भएको थियो ।
सोही सहमतिअनुसार उनीहरूबीच एकता घोषणा हुन लागेको हो । गौतमलाई नेकपा एसमा तेस्रो वरीयताको वरिष्ठ नेता दिने सहमति भएको छ । हाल एकीकृत समाजवादीमा अध्यक्ष माधव नेपाल पहिलो वरीयता, सम्मानित नेता झलनाथ खनाल दोस्रो वरीयतामा छन् । गौतम खनालपछिको वरीयतामा हुनेछन् ।
५ वर्षअघि नेकपा विभाजन भएर एमाले र नेकपा माओवादी हुँदा कतै पनि नलागी नेकपा एकता अभियान थालेका नेता गौतम अन्ततः नेपाल नेतृत्वको नेकपा एसमा समाहित हुन पुगेका हुन् ।
यस अगाडि नै गौतम नेकपा एसमा जान खोजे पनि त्यसवेला गौतमले मागेको पद अध्यक्ष नेपालले दिन आनाकानी गरेपछि एमालेमा जान छलफल चलाएका थिए । एमाले अध्यक्ष केपी ओलीले पनि एमालेमा आएपछि गौतमलाई उचित जिम्मेवारी दिने तर विधान महाधिवेशनले पद व्यवस्थापन गर्ने बताएका थिए ।
गौतम एमालेमा समाहित हुन तयार नै देखिएपनि एमालेको सचिवालय बैठकले गौतम नेतृत्वको राष्ट्रिय एकता अभियानसँग सहकार्य गर्दै जाने’ भन्ने मात्रै निर्णय गरेपनि एमालेले उनलाई खासै वास्ता गरेको थिएन ।
२०७८ सालमा नेकपा एमाले विभाजित भएपछि गौतम ओलीसँग असन्तुष्ट बन्दै सोही पार्टी छाडेका थिए । त्यही बेला माधव नेपाल एमालेबाट छुट्टिएर नेकपा एकीकृत समाजवादी पार्टी गठन गर्न पुग्दा अलग्गै बसेका थिए । नेकपाकालमा ओली र प्रचण्डबिच अन्तरविरोध चुलिँदा गौतम प्रचण्डरमाधवतिर लागेका थिए ।
