काठमाडौं– नेपाल बैंक लिमिटेडको विशेष साधारण सभाले सञ्चालक समितिमा साविकको व्यवस्थामा परिवर्तन गरी सेयरधनीको प्रतिनिधित्व बढाएको छ ।
भर्चुअल रुपमा आज गरिएको सभाले नेपाल सरकारबाट मनोनयन हुने चार सञ्चालकबाट घटाई तीन र सर्वसाधारण सेयरधनीका तर्फबाट निर्वाचित हुने दुईबाट वृद्धि गरी तीन कायम गर्ने व्यवस्था पारित गरेको छ ।
नियमावलीको सम्बन्धित दफामा संशोधन गर्नाका साथै बैंक तथा वित्तीय संस्थासम्बन्धी ऐन, २०७३ बमोजिम हुने गरी प्रबन्धपत्र तथा नियमावलीलाई समयानुकूल अद्यावधिक गर्न प्रबन्धपत्र तथा नियमावलीका अन्य व्यवस्थामा संशोधन थपघट गर्ने प्रस्ताव सभाबाट पारित भएको बैंकका प्रवक्ता प्रकाशकुमार अधिकारीले जनाए ।
