काठमाडौं– उद्योग वाणिज्य तथा आपूर्तिमन्त्री लेखराज भट्ट बजार अनुगमनमा निस्किएका छन् । उपभोग्य पदार्थको मूल्यवृद्धि भएपछि उनी आफैं बजार अनुगमनमा निस्किएकी हुन् ।
अनुगमनका क्रममा मन्त्री भट्टले आज कालीमाटी, बल्खु र लगनखेल क्षेत्रका तरकारी पसलमा पुगेका उनका स्वकीय सचिव हितेश ओझाले जानकारी दिए ।
‘मन्त्रीसमक्ष बिहानै उपभोक्ताले प्याजको मूल्य एक्कासि बढेको गुनासो गर्नुभयो, अनि उहाँ आफैं झण्डाविनाको गाडी लिएर तरकारी पसलमा जानुभयो,’ उनले भने, ‘ग्राहक बनेर मन्त्रीले करिव २० केजी प्याज समेत किन्नुभयो । मन्त्रीलाई कसैले चिनेनन् ।’
बजारमा मूल्यभन्दा बढीमा प्याजको बिक्रीवितरण पाइएपछि तत्काल मन्त्रीले स्थानीय प्रशासनलाई खबर गरेर ती थोक पसललाई कारबाही गर्न निर्देशन दिएको स्वकीय सचिव ओझाले बताए ।
ओझाका अनुसार वाणिज्य विभागले बढी मूल्यमा प्याज बिक्री गर्ने पसललाई कारवाहीको प्रक्रिया समेत अगाडि बढाइसकेको छ । अहिले भारतबाट प्याज निर्यात नभएपछि व्यापारीले दोब्बरमूल्यमा प्याज बिक्री गरिरहेका छन् । चाडपर्व नजिकिदै गर्दा तरकारी, खाद्यपदार्थको मूल्य बढेको छ ।
