काठमाडौँ । राष्ट्रिय स्वतन्त्र पार्टी (रास्वपा) का सभापति एवं चितवन क्षेत्र नं. २ बाट निर्वाचित सांसद रवि लामिछानेलाई पर्सा जिल्ला अदालतले वारेसमार्फत मुद्दा लड्न अनुमति दिएको छ।
सानो पाइला बचत तथा ऋण सहकारी ठगी प्रकरणमा तानिएका लामिछानेको मागबमोजिम अदालतले सो सुविधा दिएको हो। पर्सा जिल्ला अदालतका न्यायाधीश सुमन कुमार न्यौपानेको इजलासले लामिछानेलाई वारेस राख्न पाउने अनुमति दिएको अदालत स्रोतले जनाएको छ।
अदालतको यो आदेशसँगै अब लामिछानेले प्रत्येक तारिखमा आफैँ अदालत उपस्थित हुनुपर्ने बाध्यता हटेको छ। उनले आफ्नो तर्फबाट प्रतिनिधि (वारेस) नियुक्त गरी कानुनी प्रक्रिया अगाडि बढाउन पाउनेछन्।
लामिछाने गत फागुन २१ गते सम्पन्न उपनिर्वाचनमा चितवन–२ बाट पुनः निर्वाचित भएका थिए। उनीमाथि विभिन्न सहकारीको रकम अपचलन गरेको आरोपमा अनुसन्धान र कानुनी प्रक्रिया जारी छ।
