काठमाडौँ । नवनियुक्त गृहमन्त्री सुदन गुरुङ ले भ्रष्टाचारप्रति शून्य सहनशीलताको नीति अपनाउँदै कडा कदम चाल्ने घोषणा गरेका छन्। गृह मन्त्रालयमा पदभार ग्रहण गरेपछि कर्मचारीलाई निर्देशन दिँदै उनले सेवा प्रवाहलाई सहज र प्रभावकारी बनाउन जोड दिए। “कसैले घुस मागे त्यसलाई कुनै हालतमा छुट दिइने छैन,” उनले स्पष्ट पारे।
गुरुङले मन्त्रालयको कामलाई परिणाममुखी बनाउने बताउँदै ‘एकद्वार प्रणाली’मार्फत छिटो र सरल सेवा उपलब्ध गराउने व्यवस्था मिलाउन निर्देशन दिएका छन्। सेवाग्राहीले अनावश्यक रूपमा कोठा–कोठा धाउनुपर्ने अवस्थाको अन्त्य गर्नुपर्ने उनको भनाइ छ। “म धेरै बोल्नेभन्दा काम गरेर देखाउनेतर्फ केन्द्रित छु,” भन्दै उनले सुशासन कायम गर्न कर्मचारीहरूलाई जिम्मेवार ढंगले काम गर्न आग्रह गरे।
जेनजी आन्दोलनबाट आएको जनआकांक्षालाई कार्यान्वयन गर्ने दायित्व सरकारको भएको उल्लेख गर्दै उनले मन्त्रिपरिषद्का निर्णयहरू पूर्ण रूपमा लागू गर्न सबै निकायलाई सचेत गराए। निर्देशनका क्रममा उनले परिवर्तनका लागि योगदान दिने सहिदहरूको सम्झनामा एक मिनेट मौनधारण समेत गराएका थिए। यसअघि मन्त्रालयमा उनलाई गृहसचिवसहित सुरक्षा निकायका प्रमुख र उच्च अधिकारीहरूले स्वागत गरेका थिए।
