काठमाडौं । नवनिर्वाचित प्रतिनिधिसभाका सदस्यहरूको शपथ ग्रहण भोलि (बिहिबार) हुने भएको छ । आज प्रतिनिधिसभाका जेष्ठ सदस्य नेपाली अर्जुननरसिंह केसीले शपथ खाइसकेका छन् ।
उनले राष्ट्रपति रामचन्द्र पौडेलबाट शपथ ग्रहण गरेका हुन । उनले भोलि दिउँसो २ बजे प्रतिनिधिसभाका अन्य २७४ जना सदस्यलाई शपथ ग्रहण गराउने कार्यक्रम रहेको सांसद सचिवालयले जनाएको छ ।
बिहिबार (भोलि) हुने नवनिर्वाचित प्रतिनिधिसभाका सदस्यको शपथ ग्रहण कार्यक्रममा ४९ सांसदले मातृभाषामा शपथ लिने तयारी गरेको सचिवालयले जनाएको छ । नवनिर्वाचित ४९ जना प्रतिनिधिसभा सदस्यले नेपालीबाहेक आफ्नै मातृभाषामा पद तथा गोपनीयताको शपथ लिने भएका छन्। सङ्घीय संसद् सचिवालयका अनुसार सांसदहरूले मैथिली, भोजपुरी, नेपाल भाषादेखि लिएर संस्कृतसम्मका भाषाहरूमा शपथ लिन नाम दर्ता गराएका हुन्।
सचिवालयका अनुसार नेपालीपछि अधिकांश सांसदले मैथिली र नेपाल भाषामा शपथ लिनेछन्। केही सांसदले लोपोन्मुख भाषाहरू पनि रोजेका छन्।
सांसद खुश्बु ओलीले संस्कृत भाषामा शपथ लिने तयारी गरेकी छन्। त्यस्तै, बझाङ्गी, डोटेली, चाम्लिङ, बान्तवा, छन्त्याल र मगर खाम भाषाजस्ता रैथाने भाषाहरू पनि यसपटक संसदमा गुञ्जिनेछन्।
केही सांसदले थारु भाषाभित्रको पनि राना थारु र कठरीया थारु भाषामा शपथ लिने भन्दै नाम टिपाएका छन्।
मैथिलीः रामजी यादव, शम्भु कुमार यादव, सिताराम साह, अंकिता ठाकुर, आशा झा, उज्जल कुमार झा, कामिनी कुमारी, तपेश्वर यादव, दिपक कुमार साह, निशा मेहता लगायत।
नेपाल भाषाः विराजभक्त श्रेष्ठ, रुकेश रन्जित, शाहजान खातुन, अनुष्का श्रेष्ठ, कुलभक्त शाक्य, कुशुम महर्जन, गंगालक्ष्मी अवाल, मदनकृष्ण श्रेष्ठ लगायत।
भोजपुरी र बज्जिकाः रविन्द्र पटेल, कन्हैया बनिया, बुद्धि प्रसाद पन्त (भोजपुरी) तथा राजेश कुमार चौधरी, नितिमा भण्डारी (बज्जिका)।
थारुः सुरेन्द्र चौधरी, अमर कान्त चौधरी, अशोक कुमार चौधरी, गीता चौधरी, प्रमिला कुमारी गच्छदार (थारु), कृपाराम राना (राना थारु) र करिश्मा कठरिया (कठरीया थारु)।
डोटेली र बझाङ्गीः हरिणा देवी कामी, आकृति अवस्थी, दिपक राज बोहरा (डोटेली) र ऐन बहादुर महर (बझाङ्गी)।
किराँती तथा पहाडी भाषाः निश्कल राई (चाम्लिङ), ध्रुवराज राई (बान्तवा), गंगा छन्त्याल (छन्त्याल), रेनुका काउचा (मगर खाम भाषा) र परशुराम तामाङ्ग (तामाङ्ग)।
अन्यः मोहम्मद इश्तियाक राई (अवधि), राज किशोर महतो, जोग कुमार बरबरिया यादव, प्रमोद कुमार महतो (मगही) र खुश्बु ओली (संस्कृत)।
