काठमाडौँ । वार्षिक रुपमा अमेरिकाको लस भेगासमा आयोजना हुने विश्वकै ठूलो इलेक्ट्रोनिक्स प्रदर्शनी ‘सीईएस’मा यस वर्ष चिनियाँ मानवरूपी रोबोटहरूले मुख्य आकर्षणको रूपमा स्थान बनाएका छन्।
टीसिएलको एमी रोबोटले घुम्न, अभिनय गर्न र विभिन्न कार्य गर्ने पर्याप्त बुद्धिमत्ता प्रदर्शन गर्न सक्षम भएको निर्माताहरूले बताएका छन्। चीनको शेन्जेनस्थित ह्युमनोइड रोबोटिक्सले मानवजस्तै विभिन्न काम गर्न सक्ने रोबोट निर्माण गरेको छ। निर्माण कम्पनी एजेबोटका प्रवन्धक सन किनका अनुसार, हाम्रा रोबोटहरू अत्यन्त लचिलो छन् र मनोरञ्जन, कार्यक्रम तथा शिक्षाका क्षेत्रमा उपयोगी छन्। आगामी चरणमा यी रोबोटहरूलाई घरमा बालबालिका र वृद्धहरूको हेरचाह गर्न तयार गरिनेछ।
त्यस्तै, चिनियाँ कम्पनी युनिएक्स एआईले प्रत्येक महिना १०० भन्दा बढी वान्डा रोबोट ग्राहकसम्म पुर्याउने गरेको छ। वान्डा रोबोट भाँडा माझ्न, ओछ्यान सुसज्जित गर्न र लुगा धुन सक्षम छ। युनिएक्स एआईका संस्थापक फ्रेड याङका अनुसार, मुख्य माग होटल, उद्योग र सुरक्षा क्षेत्रमा रहेको छ। यी रोबोटहरूले होटल सफाई, सामान डेलिभरी र सुरक्षा कार्यमा योगदान पुर्याउने गर्छन्। यसैबीच, बोस्टन डाइनामिक्सको रोबोट एटलसले सीईएसमा पहिलो पटक सार्वजनिक प्रदर्शन गरेको थियो, जसले रोबोटिक्समा नयाँ आयाम थपेको छ।
