काठमाडौं । रास्वपाको समानुपातिक तर्फ बन्दसूचीमा रहेका आशिफ शाहले सूचीबाट नाम फिर्ता लिएको घोषणा गरेका छन् ।
शनिबार बिहान सामाजिक संजालमार्फत उनले आफ्नो समानुपातिक उम्मेदवारी फिर्ता लिएको घोषणा गर्दै प्रत्यक्ष निर्वाचनमा भाग लिने बताएका छन् ।
यस्तो छ उनको स्टाटस
राजनीतिमा चासो राख्ने तर सक्रिय राजनीतिमा संलग्न नहुने व्यक्ति हुँ म। तर देश बन्नुपर्छ भन्ने हुटहुटी भने सधैँ मेरो मनभित्र जीवित छ। आम जनताको चाहना अनुरूप बालेन–रवि–कुलमानको मिलन सम्भव होस् भनेर गरिएका प्रयासहरूलाई नजिकबाट मूल्याङ्कन गर्ने साथीहरू यसका साक्षी छन्। त्यही मिहिनेतलाई देखेर साथीहरूले मलाई “सांसद बन्नुपर्छ” भन्दै सूचीमा नाम समावेश गर्नुभयो।
म राजनीतिमा यदि आउनै परे प्रत्यक्ष निर्वाचनमार्फत जनतासँगै उभिएर उम्मेदवारी दिन चाहन्छु भनेर स्पष्ट रूपमा भनेको थिएँ। तर साथीहरूको सुझाव थियो—देशव्यापी चुनावी अभियान आवश्यक छ, त्यसैले अहिले समानुपातिक प्रणालीमै अघि बढ्नुपर्छ।त्यसै अनुरूप समानुपातिक प्रणाली अन्तर्गत मेरो उम्मेदवारी दर्ता भयो।
तर त्यसपछि आएका समाचारहरू, जनताबाट व्यक्त प्रतिक्रियाहरू र रास्वपाका साथीहरूको भावनाले मलाई गहिरो आत्ममन्थन गर्न बाध्य बनायो।सही नियत हुँदाहुँदै पनि कतै न कतै गल्ती हुन पुगेछ भन्ने अनुभूति भयो।
देश निर्माणका लागि आवश्यक योगदान, म जुनसुकै पद वा हैसियतमा रहे पनि, सधैँ गर्न तयार छु।
तर जनता र पार्टीका साथीहरूको भावनामा चोट पुर्याएर समानुपातिक सूचीमार्फत सांसद बन्ने बाटो म रोज्न सक्दिनँ।
यसै सूचनामार्फत म मेरो समानुपातिक उम्मेदवारी फिर्ता लिएको घोषणा गर्दछु|
साथै, जनता र पार्टीका साथीहरूको भावना अनुरूप, समानुपातिक सूचीमा रहेका अन्य साथीहरूलाई पनि आ–आफ्नो नाम फिर्ता लिएर दुई कदम पछाडि हट्न विनम्र आग्रह गर्दछु।
प्रत्यक्ष निर्वाचनमा उठ्ने निर्णय स्पष्ट छ—
प्रत्यक्ष निर्वाचनमा उठ्नुपर्छ—उठ्ने नै हो।
हामी काठमाडौँ–५ बाट
प्रत्यक्ष उम्मेदवारी दिन
पूर्ण रूपमा तयार छौं।
देशभन्दा ठूलो केही हुँदैन।
🙏🇳🇵
— आशिफ शाह
शुक्रबार उज्यालो नेपाल पार्टीमा रहेर रास्वपाको समानुपातिक तर्फ बन्दसूचीमा रहेकी डा. त्रिशला गुरुङ, पर्वतारोही टासी लाक्पा शेर्पाले पनि सूचीबाट नाम फिर्ता लिएको घोषणा गरिसकेकी छन् । पछिल्लो समय रास्वपाको समानुपातिक बन्द सूचीप्रति असन्तुष्ट बढिरहेका बेला उम्मेदवारी फिर्ता लिने कार्य पनि बढिरहेको देखिन्छ ।
