काठमाडौँ । जेन जी अगुवा रक्षा बमले प्रत्यक्ष निर्वाचित कार्यकारी प्रणाली र तत्काल संविधान संशोधनको प्रस्तावसहितको ‘ड्राफ्ट’लाई ‘अलोकतान्त्रिक र खतरनाक हस्तक्षेप’ भन्दै टिप्पणी गरेकी छन् । पछिल्ला दिनमा प्रत्यक्ष निर्वाचित कार्यकारी र तत्काल संविधान संशोधन लेखिएको ड्राफ्ट शहरभरि वितरण भइरहेको दाबी गर्दै यसबारे उनले आफ्नो धारणा सार्वजनिक गरेकी हुन् ।
बमका अनुसार यस्तो ड्राफ्ट अहिले मात्र नभई २४ भदौदेखि नै मानिसका हातमा पुग्न थालेको थियो । उनले यसलाई केही स्वार्थप्रेरित समूहले संविधानको मूल मर्ममै प्रहार गर्न खोजेको चाल भनेर टिप्पणी गरेकी छन् । प्रधानमन्त्री र एमाले शीर्ष नेताबीच गत शुक्रबार भएको भेटमा पनि यही ड्राफ्टबारे कुराकानी भएको समाचार सार्वजनिक भइसकेको उनले उल्लेख गरेकी छन् ।
विगत केही सातादेखि केही स्वार्थ समूहद्वारा प्रेरित व्यक्तिहरूले तयार पारेको भनिने उक्त ड्राफ्टबारे बमले सामाजिक सञ्जाल फेसबुकमार्फत असहमति व्यक्त गरेकी छन् । बमले पछिल्लो समय जेन–जी युवाहरू मात्र होइन, समाजमा प्रभाव राख्ने केही व्यक्ति पनि उक्त ड्राफ्ट बोकेर छलफलमा हिँडिरहेको जानकारी आफूहरूले पाएको उल्लेख गरेकी छन् ।
‘संविधान संशोधनजस्तो संवेदनशील मुद्दा दबाबमार्फत् अघि सार्ने प्रयास अस्वीकार्य छ,’ उनले लेखेकी हु्न, ‘हामी संविधान पुनरावलोकनको पक्षमा छौँ, तर त्यसका लागि जनताको स्पष्ट म्यान्डेट अपरिहार्य छ ।’ जो कोही व्यक्ति वा समूहले प्रत्यक्ष निर्वाचित कार्यकारी जस्ता एजेन्डा अघि सार्न चाहन्छ भने चुनावी घोषणापत्रमार्फत जनतासामु जानुपर्ने र यही लोकतान्त्रिक बाटो रहेको उनको सुझाव छ ।
‘देश जादुको छडीले होइन, विधिको शासन र लोकतान्त्रिक मूल्यले चल्छ,’ बमले लेखेकी हुन्, ‘सङ्क्रमणको यस्तो बेला संविधानका मूल मर्ममै प्रहार गर्ने खेल स्वीकार्य छैन ।’
‘कतिपय साथीहरू आन्दोलनमै थिएनन् । कतिपयलाई त संविधान के हो भन्ने आधारभूत ज्ञान पनि थिएन । उनलाई लाग्छ–व्यवस्था फेरिए रातारात सबै समस्याको जादुयी समाधान आइलाग्छ । तर, देश जादुको छडीले चल्दैन’, उनले लेखेकी छन् । बमले संक्रमणकालीन अवस्थामा अनावश्यक हस्तक्षेप गर्दै देशलाई अनिश्चिततामा धकेल्न खोज्नेहरूलाई ‘होसियार’ भन्दै चेतावनी दिएकी छन् ।
