काठमाडौँ । राष्ट्रिय स्वतन्त्र पार्टी (रास्वपा)का सांसद शिव नेपालीले नेपालको भूमि लिपुलेक र कालापानीको संरक्षणका लागि पहल गर्न नेपाल सरकारसँग माग गरेका छन् ।
प्रतिनिधिसभाको बिहिबारको बैठकमा आकस्मिक समयमा बोल्दै सांसद नेपालीले भने, ‘लिपुलेक र कालापानीको भूभाग छिमेकी देशहरुले प्रयोग गर्ने भन्ने विषय आम सञ्चार माध्यममा आएको छ। नेपालको भूभागको संरक्षण गर्न नेपाल सरकारले यथाशिघ्र पहल गर्नेछ भन्ने विश्वास हामीले लिएका छौं ।’
सरकार नयाँ वैकल्पिक शक्तिलाई सिध्याउने खेलमा लागेको र सोही अनुसार रवि लामिछानेमाथि अन्याय गरेको बताउँदै अहिले फेरि आदिवासी जनजाति समुदायकी छोरी उपसभामुख इन्दिरा राना मगर माथि अंकगणितीय खेल खेल्न लागेको बताए । यो लोकतन्त्रको अपमान भएको उनको भनाइ थियो ।
‘हामी २०७९ पौष ७ गते यस सम्मानित सदनमा पाइला टेकेका हौं। उपसभामुखज्यूले २०७९ माघ ५ गते आफ्नो पदभार ग्रहण गर्नुभयो । त्यसपछाडि फागुन १४ गते एउटा सामान्य पत्र, एउटै कार्यक्रममा अन्तर्वार्ताको मिति मिलाइदिनुस् भन्ने भनेको थियो । त्यो पत्र कहीँ कतै दर्ता छैन,’ नेपालीले भने, ‘कार्यान्वयन भएको पनि छैन। भिसाको लागि सिफारिस पनि छैन। तर त्यसलाई १७ महिना लुकाएर साउन २०८१ मा बदनियतपूर्वक सार्वजनिक गरियो ।’
