काठमाडौँ । अमेरिकाको मियामी अन्तर्राष्ट्रिय विमानस्थलमा अमेजन एयरको कार्गो विमान दुर्घटना हुँदा कम्तीमा पाँच जनाको मृत्यु भएको छ भने पाँच जना घाइते भएका छन्।
स्थानीय समयअनुसार आइतबार दिउँसो करिब २ बजे अवतरण गर्ने क्रममा बोइङ ७६७–३०० विमान रनवेबाट बाहिरिएर दुर्घटनामा परेको हो। प्रारम्भिक विवरणअनुसार विमान करिब २०९ किलोमिटर प्रतिघण्टाको गतिमा रनवेबाट बाहिरिएको थियो। दुर्घटनापछि विमानस्थल परिसरमा रहेका केही सवारीसाधनमा विमान ठोक्किएको र त्यसपछि आगलागी भएको जनाइएको छ। घटनालगत्तै करिब २०० जना दमकलकर्मी परिचालन गरी आगो नियन्त्रणमा लिनुका साथै उद्धार कार्य अघि बढाइएको थियो। अधिकारीहरूका अनुसार घाइतेमध्ये तीन जनालाई स्थानीय ट्रमा सेन्टरमा लगिएको छ भने अन्य दुई जनाको अस्पतालमा उपचार भइरहेको छ। दुर्घटनाको कारणबारे सम्बन्धित निकायले अनुसन्धान थालेका छन्।
