काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले पार्टी संगठनलाई आधुनिक र प्रभावकारी बनाउन डिजिटल प्रविधिको व्यापक प्रयोग आवश्यक रहेको बताएका छन्। उनले पार्टी विस्तार र सुदृढीकरणका लागि ठूलो संख्यामा प्रविधिमैत्री कार्यकर्ता तयार गर्नुपर्ने धारणा राखेका छन्।
शुक्रबार काठमाडौंमा आयोजित डिजिटल सदस्यता नवीकरण तथा वितरण अभियानको शुभारम्भ कार्यक्रममा बोल्दै उनले बदलिँदो राजनीतिक र सामाजिक परिवेशमा प्रविधिको उपयोग अपरिहार्य बनेको बताए। पार्टीलाई नयाँ चुनौतीसँग जुध्न सक्षम बनाउन ‘आइटी फौज’ निर्माण गर्नुपर्नेमा उनले जोड दिए। प्रचण्डले निर्वाचनमा ठूलो रकम खर्च हुने गरेको उल्लेख गर्दै प्रविधि र डिजिटल संरचना विकासमा पर्याप्त लगानी हुन नसकेकोप्रति असन्तुष्टि व्यक्त गरे। प्रविधिमा थप लगानी गर्न सके संगठन निर्माण र जनसम्पर्क विस्तारमा सकारात्मक परिणाम हासिल गर्न सकिने उनको भनाइ थियो। उनले डिजिटल माध्यममार्फत पार्टीलाई जनतासँग अझ नजिक बनाउने र संगठनलाई थप प्रभावकारी बनाउने योजना रहेको बताए। यसै क्रममा उनले वर्तमान सरकारको नीति, कार्यक्रम र बजेटप्रति आलोचना गर्दै सरकारका निर्णयहरू आम नागरिक, मजदुर र किसानको हितभन्दा बढी सीमित वर्गको पक्षमा केन्द्रित भएको आरोप लगाए। साथै, उनले पार्टीका नेता–कार्यकर्तालाई निराशा फैलाउने गतिविधिबाट टाढा रहँदै नयाँ ऊर्जा, सोच र उत्साहका साथ संगठन निर्माणमा जुट्न आग्रह गरे।
