काठमाडौँ। नेकपा (एमाले)का प्रमुख सचेतक ऐन महरले पश्चिम नवलपरासीको सुस्ता क्षेत्रका बासिन्दाले देखाएको साहस र भूमिप्रतिको प्रतिबद्धताको प्रशंसा गर्दै संसद्मा टोपी खोलेर सम्मान व्यक्त गरेका छन्।
शुक्रबार प्रतिनिधिसभा बैठकमा बोल्दै महरले सुस्तामा भारतीय सीमा सुरक्षा बल (एसएसबी)का सुरक्षाकर्मी प्रवेश गरेको घटनाको उल्लेख गर्दै स्थानीयवासीले त्यसको प्रतिकार गरेको भन्दै उनीहरूप्रति सम्मान प्रकट गरेका हुन्। उनले उक्त विषयलाई राष्ट्रिय स्वाभिमानसँग जोडिएको मुद्दा भएको उल्लेख गर्दै सरकारको ध्यानाकर्षण गराए। साथै, सीमासम्बन्धी विषयमा सरकारले स्पष्ट र प्रभावकारी भूमिका खेल्नुपर्ने आवश्यकता औँल्याए। महरले सुस्तावासीको कदमलाई राष्ट्रहितको पक्षमा भएको कार्यको संज्ञा दिँदै संसद्कै रोष्ट्रमबाट टोपी खोलेर शिर निहुराउँदै उनीहरूप्रति कृतज्ञता व्यक्त गरे। उनले भने, सुस्ताका नागरिकहरूले आफ्नो भूमि र स्वाभिमानको रक्षा गर्न देखाएको साहस प्रशंसनीय छ र उनीहरू राष्ट्रवादी भावनाका प्रतीक बनेका छन्। उनको उक्त अभिव्यक्तिपछि संसद् बैठकमा केहीबेर विशेष ध्यानाकर्षण भएको थियो।
