काठमाडौँ । विश्व फुटबलको सबैभन्दा ठूलो प्रतियोगिता विश्वकप सुरु भएको ९६ वर्ष पूरा भएको छ। अबको दुई दिनपछि अमेरिका, मेक्सिको र क्यानडामा २३औँ संस्करणको विश्वकप सुरु हुँदैछ।
विश्वकपको चर्चा चलिरहँदा सन् २०१४ को एउटा ऐतिहासिक तथा अविस्मरणीय खेल फेरि सम्झनामा आउँछ, जहाँ ब्राजिलले आफ्नै घरेलु मैदानमा फुटबल इतिहासकै सबैभन्दा पीडादायी हार बेहोरेको थियो। विश्व फुटबलको शक्तिशाली राष्ट्र ब्राजिल घरेलु मैदानमा छैटौँ विश्वकप उपाधि जित्ने लक्ष्यसहित मैदान उत्रिएको थियो। लाखौं समर्थक र घरेलु दर्शकको साथले टोली उत्साहित थियो। तर सेमिफाइनलमा जर्मनीविरुद्ध भएको खेलले ब्राजिलको सपना मात्र तोडेन, फुटबल इतिहासमै एउटा अप्रत्याशित अध्याय थपिदियो। जुलाई ८, २०१४ मा बेलो होरिजोन्टेमा भएको सेमिफाइनलमा जर्मनीले ब्राजिललाई ७–१ को फराकिलो अन्तरले पराजित गर्यो। खेलको पहिलो हाफमै जर्मनीले २९ मिनेटभित्र पाँच गोल गर्दै ब्राजिललाई स्तब्ध बनाएको थियो। घरेलु समर्थकले भरिएको रंगशालामा ब्राजिली खेलाडीहरू निराश र असहाय देखिएका थिए।
मुख्य खेलाडी नेयमार चोटका कारण अनुपस्थित थिए भने कप्तान तथा डिफेन्डर थियागो सिल्भा निलम्बनका कारण मैदान बाहिर थिए। यी दुई महत्वपूर्ण खेलाडीको अनुपस्थितिले ब्राजिलको टोली कमजोर बनेको देखियो। खेलअघि नेयमारको जर्सी बोकेर मैदान प्रवेश गरेका ब्राजिली खेलाडीहरू भावनात्मक रूपमा दबाबमा देखिएका थिए। ब्राजिलले सन् १९७५ यता घरेलु मैदानमा कुनै प्रतिस्पर्धात्मक खेल नहारेको इतिहास बोकेको थियो। त्यसैले समर्थकहरू उपाधि आफ्नै देशमा रहने विश्वासमा थिए। तर जर्मनीले आक्रामक खेल प्रस्तुत गर्दै त्यो विश्वास केही मिनेटमै भत्काइदियो। यो हारपछि ब्राजिलभरि निराशा र शोकको वातावरण छाएको थियो। धेरै खेलाडी आँसु झार्दै मैदान छाडेका थिए भने पूर्व खेलाडी र फुटबल विज्ञहरूले समेत यसलाई देशको फुटबल इतिहासकै सबैभन्दा पीडादायी क्षणको रूपमा व्याख्या गरेका थिए।
सेमिफाइनलमा ब्राजिललाई हराएपछि जर्मनीले फाइनलमा अर्जेन्टिनासँग प्रतिस्पर्धा गर्यो। रियो दि जेनेरियोस्थित माराकाना रंगशालामा भएको फाइनल निकै प्रतिस्पर्धात्मक रह्यो। निर्धारित समय र अतिरिक्त समयको अधिकांश भाग गोलरहित बराबरीमा बित्यो। खेल पेनाल्टी सुटआउटतर्फ जान लागेका बेला अतिरिक्त समयको ११३औँ मिनेटमा मारियो गोएट्जेले निर्णायक गोल गरे। उक्त गोलले जर्मनीलाई चौथोपटक विश्वकप च्याम्पियन बनायो। यस उपलब्धिसँगै जर्मनी दक्षिण अमेरिकी भूमिमा विश्वकप जित्ने पहिलो युरोपेली राष्ट्रसमेत बन्यो। लामो समयदेखि ठूला प्रतियोगितामा असफल हुँदै आएको जर्मन टोलीले उक्त सफलतामार्फत आफूलाई फेरि विश्व फुटबलको शीर्ष शक्तिका रूपमा स्थापित गरेको थियो।
