सुदूरपश्चिम प्रदेशका मुख्यमन्त्री त्रिलोचन भट्टले निर्वाचन आचारसंहिताको पालना सबैको दायित्व रहेको बताएका छन् ।
निर्वाचन आयोग र नेपाल कानून समाजले आज धनगढीमा आयोजना गरेको ‘निर्वाचन आचारसंघिताको प्रभावकारी कार्यान्वयन र सरोकारवालहरुको भूमिका’ विषय गोष्ठीमा उनले आचारसंहिता सबैले पालना गर्नु पर्ने बताएका हुन ।
‘नागरिकले आफूले नगर्नु पर्ने कार्यहरु नगरि दिए आचारसंहिताको आवश्यकता नै पर्दैनथ्यो’, उनले भने । ‘तर, त्यस्तो नभइ दिएकाले कानून, हाम्रो विधि र आचारसंहिता बनेको हो । यसको पालना सबैले गर्नु पर्दछ ।’ भयरहित वातावरणमा आफूले चाहेको जनप्रतिनिधि चुन्न पाउने अधिकार सबैलाई रहेको मुख्यमन्त्रीको भनाइ थियो ।
प्रमुख निर्वाचन आयुक्त दिनेशकुमार थपलियाले आगामी स्थानीय तहको निर्वाचनमा निर्वाचन आचारसंहितालाई कडाइका साथ कार्यान्वयन गरिने बताएका छन्।
विगतमा आचारसंहिता कार्यान्वयन र अनुगमन प्रभावकारी नभएको तथा उल्लङ्घन गर्नेलाई कारबाही नगरेको भनेर आयोगमाथि प्रश्न उठ्ने गरेको उल्लेख गर्दै उनले यसपालि त्यसो हुन नदिने प्रतिबद्धता जनाए। ‘यसपालि पहिलेजस्तो हुँदैन। उल्लङ्घन गर्नेलाई छुट दिइन्न, ठाउँको ठाउँ कारबाही गरिन्छ,’ उनले भने, ‘त्यतिले भएन भने कानुनअनुसार दण्डित पनि गर्छौँ।’
उनले आचारसंहिता कार्यान्वयन र अनुगमनलाई प्रभावकारी बनाउन सबै तहमा अनुगमन समिति गठन गरिनेसमेत जानकारी दिए।
