एजेन्सी – नरिवलको रक्सी सेवन गर्दा फिलिपिन्समा कम्तीमा आठ जनाको मृत्यु भएको छ।
रक्सीकै कारण विरामी भएका सयौँ जना अस्पताल भर्ना भएको रोयटर्सले जनाएको छ। उनीहरुले सेवन गरेको रक्सीमा ‘मेथनल’ भन्ने पदार्थ अत्यधिक धेरै भएकाले असर गरेको हुन सक्ने विश्वास गरिएको छ।
राजधानी मनिलादेखि दक्षिणपूर्वी क्षेत्रमा पर्नेे रिजाल भन्ने ठाउँमा भएको हप्तान्त भेलामा सहभागी भएर रक्सी सेवन गरेकाहरु मध्ये केहीको मृत्यु भएको र केही बिरामी भएका हुन्।
रक्सी सेवन गरेपछि उनीहरुले सुरुमा पेट दुखेको बताएका थिए। बिरामी भएका मध्ये नौ जनाको अवस्था गम्भीर रहेको राजधानी मनिलास्थित फिलिपिन्स जनरल अस्पतालका प्रवक्ता जोसे जोनास डेल रोसारिओले जानकारी दिनुभयो।
रक्सी सेवनका कारण बिरामी भएका ३ सय जना अस्पतालमा भर्ना भएका उहाँले बताउनु भयो। उनीहरु सवैको बिरामीको कारण एउटै देखिएको चिकित्सकहरुको भनाई छ।
क्रिसमसको अवसरमा अत्यधिक माग हुने यस रक्सीको बेचविखन, वितरण र सेवनमा प्रतिबन्ध लगाउन स्थानीय सरकारले आदेश दिएको छ। बजारमा बिक्री वितरणका लागि नरिवलको अधिकांश रक्सी स्थानीय बासिन्दाले बनाउने गर्दछन्।
रक्सी बनाउने अधिकांश स्थानीय बासिन्दा पछाडी पारिएको समुदाय हुने गरेका छन्। अशिक्षित समूदायले बनाउने रक्सीमा गुणस्तर राम्रो नहुने गरेकाले धेरै उपभोक्ता बिरामी हुने चिकित्सकहरुको भनाई छ।
