हेटौँडा– मकवानपुरको क्षेत्र नं– २ अन्तर्गत पर्ने विभिन्न स्थानमा रु एक अर्बको लागतमा छ वटा पुल बन्ने भएका छन्।
पुल अभावका कारण आवतजवावत तथा उत्पादित वस्तुको ओसारपासारलगायतमा समस्या झेल्दै आएका स्थानीयवासी पुल बन्ने भएपछि खुशी भएका छन्।
कृषि उपजको पकेटक्षेत्र मानिने स्थानमा नै पुल नहुँदा व्यावसायिक कारोवारमा समस्या भोग्दै आएका क्षेत्र नं २ मा चालु आर्थिक वर्षमा करीब रु एक अर्बको लागतमा आधादर्जन पक्की पुल बन्ने भएका हुन्। सङ्घीय सरकारको चालु आर्थिक वर्षको बजेटमार्फत पुल निर्माण गर्न लागिएका बताइएको छ।
सो निर्वाचन क्षेत्रका सांसद विरोध खतिवडाको विशेष पहलमा पक्की पुल निर्माण गर्न लागिएको जनाइएको छ। लामो समयदेखि पुल अभावको समस्या झेल्दै आएका स्थानीय बासिन्दाको सुविधाका लागि सरकारले बजेट छुट्याएर पुल निर्माण गर्न प्रक्रिया अगाडि बढाएको हो।
सङ्घीय सरकारको लगानीमा मनहरी गाउँपालिकाको सानान्टार– हाँडीखोला जोड्ने पक्की पुल रु १७ करोड लागतमा निर्माण गर्न लागिएको बताइएको छ।
सांसद खतिवडाका अनुसार राक्सीराङ गाउँपालिकाको सरिखेत–चुलिगङ्खोला, मकवानपुरगढी गाउँपालिकाको डुम्रेकुना–गढी, थाहा नगरको घर्तीखोला–थाहानगर तसार खोला, भीमफेदी गाउँपालिकाको इपा कोगटे गाउँमा पनि पुल निर्माणको प्रक्रिया अगाडि बढाइएको छ।
केही पुलको बोलपत्र आह्वान प्रक्रिया पनि अगाडि बढाइएको छ। पुल निर्माण हुने निर्णयले स्थानीयवासी खुशी भएका छन्। पुल अभावका कारण स्थानीय नागरिकले निकै समस्या भोग्नुपरेको मनहरि गाउँपालिकाका अध्यक्ष एकराज उप्रेतीले बताएका छन्। (रासस)
