नयाँ दिल्ली — भारतमा पछिल्ला केही दिनमा पेट्रोलियम पदार्थको भाउ बढेको छ। अघिल्लो सप्ताहन्तमा साउदी अरेबियाको तेल प्रशोधन केन्द्रमा भएको ड्रोन आक्रमण भएपछि त्यहाँको तेल आपूर्ति आधामा झरेको थियो।
यस घटनाका कारण अन्तरराष्ट्रिय बजारमा कच्चा तेलको भाउ आकाशिएको थियो। फलस्वरुप विगत छ दिनमा भारतमा पनि पेट्रोलको भाउ लिटरमै १ रुपया ५९ पैसा बढ्यो। सो अवधिमा डिजेल पनि १ रुपया ३१ पैसा महँगो बन्यो।
आइतवार त्यहाँका राज्यनिन्त्रित तेल कम्पनीहरुले पेट्रोलियम पदार्थको मूल्य पुनः बढाएका छन्। राजधानी दिल्लीमा अघिल्लो दिनको तुलनामा आइतवार २७ पैसाको वृद्धिसहित पेट्रोलको मूल्य ७३ रुपया ६२ पैसामा पुगेको छ। डिजेलको भाउ पनि प्रतिलिटर १८ पैसाले बढेर ६६ रुपया ७४ पैसा कायम भएको छ। योसँगै सेप्टेम्बर १७ यता आइतवार तेलको भाउ लगातार छैठौं दिन पनि बढेको छ।
साउदी अरेबियाको प्रमुख तेल प्रशोधन केन्द्रमा मिसाइल आक्रमण पछि विश्वको तेल आपूर्ति ५ प्रतिशतले घटेको थियो। सप्ताहन्तमा भएको सो घटनाका कारण गत सोमवार अर्थात सेप्टेम्बर १६ मा विश्व बजारमा तेलको भाउ १५ प्रतिशतले बढेको थियो। तर साउदी अरेबियाले गुमेको सबै उत्पादन अपेक्षा गरेभन्दा चाँडै पुनः स्थापित गरेपछि आइतवार बाहेकका दिनमा विश्व बजारमा कच्चा तेलको भाउ खासै धेरै बढेन।
तर भारतले बाहिरबाट ल्याउने कुल मध्ये २० प्रतिशत तेल साउदी अरेबियाबाटै आयात हुने भएकोले यसको प्रभाव त्यहाँको घरेलु बजारमा निकै पछि सम्म पनि देखिएको हो। साउदी भारतको दोस्रो ठूलो तेल आपूर्तिकर्ता हो। यसले हरेक महीना भारतलाई करीब २० लाख टन कच्चा तेल बेच्दै आएको छ। (रासस)
