काठमाडौं– गत आर्थिक वर्ष ०७५ /७६ मा नेपाल प्रहरीमा कार्यरत् जवानदेखि अधिकृतसम्मका १८ सय जना कारबाहीमा परेका छन्। प्रहरी प्रधान कार्यालयले दिएको तथ्यांक अनुसार २ सय ४९ जनालाई नोकरीबाट हटाइएको छ र ७ जनालाई बर्खास्त गरिएको छ।
प्रहरीका अनुसार बर्खास्त गरिएका भविष्यमा सरकारी सेवाका लागि अयोग्य ठहरिन्छन् भने नोकरीबाट हटाइएका व्यक्ति भविष्यमा सरकारी सेवाका लागि अयोग्य ठहरिँदैनन्। नोकरीबाट हटाइएका अधिकृतमा एक जना प्रहरी उपरीक्षक पनि छन्। कञ्चनपुरको निर्मला पन्त बलात्कारपछि हत्या प्रकरणमा जिल्ला प्रहरी कार्यालयका प्रमुख एसपी डिल्लीराज विष्टलाई सेवाबाट हटाइएको थियो।
यही अवधिमा दुई जना प्रहरी निरीक्षकको पनि जागिर गएको छ भने ५ जना प्रहरी नायब निरीक्षक, ११ जना प्रहरी सहायक निरीक्षक, २४ जना प्रहरी हवल्दार र १ सय ९५ जना प्रहरी जवान सेवाबाट हटाइएका छन्। प्रहरी महानिरीक्षकको सचिवालयका अनुसार यो अवधिमा ११ जना प्रकास पनि कारबाहीमा परेका छन्। प्रकास प्रहरी जवानपछिको पद हो। बर्खास्तीमा पर्नेमा एक जना प्रहरी सहायक निरीक्षक, दुईरदुई जना प्रहरी हवल्दार र जवानसहित ११ जना प्रकाश छन्।
प्रहरी प्रधान कार्यालयले यो अवधिमा १ हजार ५ सय ४४ जनालाई विभागीय कारबाही गरेको छ। विभागीय कारबाही पाउनेमा सबैभन्दा बढी प्रहरी जवान ९ सय ८६ जना छन्। प्रहरी हवल्दारतर्फ ३ सय ३३ जना विभागीय कारबाहीमा परेका छन् भने दुई जना प्रहरी वरिष्ठ उपरीक्षक (एसएसपी)ले पनि कारबाही पाएका छन्।
विभागीय कारबाहीमा पर्नेमा दुई जना एसपी र दुई जना डीएसपी (प्रहरी नायब उपरीक्षक) छन्। विभागीय कारबाहीमा नसिहत दिने, पद घटुवा, सेवा अवधिको कम गणना, पदोन्नति रोक्का, अभिलेखमा प्रतिकूल राय राख्ने, ग्रेड घटुवा, ग्रेड रोक्का, निलम्बनलगायत पर्छ। प्रहरी प्रधान कार्यालयका अधिकृतहरु गलत कार्य गर्ने विरुद्ध निर्मम रुपमा प्रस्तुत हुने संगठनले नीति लिएर कारबाही संख्या बढेको दाबी गर्छन्।
