काठमाडौं – नेपाली कांग्रेसका सांसद सञ्जयकुमार गौतमले डेंगु नियन्त्रण गर्न नसकेको भन्दै स्वास्थ्यमन्त्रीको राजीनामा माग गरेका छन्। देश डेंगुले आक्रान्त भइसक्दा पनि सरकार मैन बनेको भन्दै उनले उपप्रधानमन्त्री तथा स्वास्थ्यमन्त्री उपेन्द्र यादवको राजीनामा माग गरेका हुन्।
‘स्वास्थ्यको जिम्मा लिएर बसेका मन्त्री कहाँ छन् ? अब त प्रधानमन्त्री पनि आइसके यो बेलामा चुप लागेर बसेर हुँदैन’ उनले भने ‘रुलिङ गरेको भरमा झारा टारेर हुँदैन, म स्वास्थ्यमन्त्रीको राजीनामा माग गर्छु, सरकार मुकदर्शक भएर हुँदैन, तत्काल संकटकाल घोषणा गरेर अघि बढ्नुपर्छ।’
सांसद गौतमले अहिले दुई तिहाइ बहुमतको सरकारले जनताको रक्षा गर्न नसके कसले गर्छ भन्ने प्रश्न पनि गरे र मन्त्री र स्वास्थ्यकर्मीसमेत डेंगु प्रभावित हुँदा पनि स्वास्थ्यमन्त्री चुप बसेको भन्दै उनले राजीनामा माग गरे।
सांसद गौतमले भने ‘मन्त्री स्वयं डेंगु रोक संक्रमित भएर अस्पतालमा छन् र स्वास्थ्यकर्मी पनि यसबाट पीडित छन्। ३ हजार मानिस डेंगुबाट पीडित छन्। सिंगो देश डेंगुको सिकार बन्दै छ। तर सरकार मौन छ। म यसमा घोर आपत्ति जनाउँदै स्वास्थ्यमन्त्रीको तत्काल राजीनामा माग गर्दछु’ भनेका छन्।
