गलकोट - सङ्घीय मामिला तथा सामान्य प्रशासनमन्त्री लालबाबु पण्डितले कम्युनिष्टहरू गङ्गटोजस्तो नभई कमिलोजस्तो बन्नुपर्ने बताएका छन्।
नेपाल कम्युनिष्ट पार्टी (नेकपा) बागलुङले आज (शनिबार) आयोजना गरेको कार्यकर्ता भेटघाट तथा छलफल कार्यक्रमलाई सम्बोधन गर्दै उनले गङ्गटो र कमिलाको उदाहरण दिँदै कार्यकर्तालाई एकताबद्ध हुन आग्रह गरेका हुन्।
“गङ्गटोले आफ्नै अभिभावकलाई देख्न सहँदैन, सिध्याउँछ, कमिलोले एकताबद्ध भएर आफूभन्दा ठूलो काम गर्छ,” उनले भने, “अब कार्यकर्ता गङ्गटो हैन, कमिलो बन्न सिकौँ।” उनले कम्युनिष्ट विचार बोकेका मानिसलाई भीडको पछि नलागी असल कार्य गर्न लाग्न सुझाव दिए।
“अहिलेको सुखी नेपाली समृद्ध नेपाल भन्ने नारा सरकारको मात्र हैन,” मन्त्री पण्डितले भने, “यो त कम्युनिष्टको पनि हो, त्यसैले सानातिना कार्यमा नअल्झिन कार्यकर्तालाई आग्रह गर्दछु।” सङ्घीयताको कार्यान्वयन सफल रूपमा हुनु भनेको नेपाल समृद्धतर्फ लम्कनु हो भन्दै मन्त्री पण्डितले सबै कार्यकर्तालाई सकारात्मक सोचका साथ सरकारलाई सहयोग गर्न आग्रह गरे।
उनले भने, “हाम्रा नेता तथा कार्यकर्ता साना कुरामा अल्झिने हैन, आन्तरिक किचलो आन्तरिक रूपमै मिलाउनुपर्छ बाहिर ल्याउन्रहुन्न।” उनले स्थानीय तहमा कर्मचारीको अभाव छिट्टै हटेर जाने जिकिर गरे। सरकारले व्यावहारिक परिवर्तनका काम गर्दै आएको भन्दै मन्त्री पण्डितले परिणाम आउन केही समय लाग्ने बताए। उनले सरकार विरोधी तत्त्वहरू आफैँ निरुत्साहित भएर जानेसमेत दाबी गरे।
उनले आज बिहानै बागलुङ नगरपालिका–४ कुडुलेस्थित निर्माणाधीन भूमिगत शालिग्राम सङ्ग्रहालयको अनुगमन र कालिका मन्दिरको दर्शन गरेका थिए। (रासस)
