तेहरान –अमेरिकाले इरानको मानवरहित विमान (ड्रोन) खसालेको भनी गरेको दाबी इरानको सशस्त्र बलले अस्वीकार गरेको छ। सबै ड्रोन शिविरमा सुरक्षित फर्केको यहाँको समाचार समितिले जानकारी दिएको छ।
अमेरिकी जल सेनाले स्ट्रेट अफ होर्मुज भनिने समुद्री मार्गमा इरानको ड्रोन खसालेको अमेरिकी राष्ट्रपति डोनाल्ड ट्रम्पले दाबी गरेका थिए। उक्त ड्रोन अमेरिकी पानीजहाजभन्दा करिब १ किलोमिटरनजिकै उड्न थालेपछि खसालिएको ट्रम्पले बताएको समाचारमा जनाइएको छ।
यस घटनाले इरानले अमेरिकालाई उत्तेजित बनाउने प्रयत्न गरेको बताउँदै आफ्ना अधिकारी, सामग्री र स्वार्थको रक्षा गर्ने अधिकार अमेरिकासँग रहेको अमेरिकी राष्ट्रपति ट्रम्पले बताएका छन्। तर, आफ्ना सबै ड्रोन सुरक्षित फर्केको इरानका सशस्त्र बलका प्रवक्ता ब्रिगेडियर जनरल अबोलफज्ल सिकार्चीले बताएका छन्।
इरानको कुनै पनि ड्रोन अमेरिकी पानी जाहाजसँग आमनेसामाने नभएको सिकार्चीले बताए। ट्रम्पका अनुसार बिहीबार ‘यूएसएस बक्सर’ले आफ्नो आत्मरक्षाका लागि आक्रमण गरेको बताएका थिए। इरानका उपविदेशमन्त्री अब्बास आरागचीले ड्रोन खसालेको यस दाबीको अस्वीकार गरेका छन्।
अमेरिका र इरानबीच सम्बन्ध तनावग्रस्त रहेको र यी घटनाका कारण उक्त क्षेत्रमा सैन्य सङ्घर्ष शुरु हुनसक्ने भय उत्पन्न भएको छ। अमेरिकाले सन् २०१५ मा इरानसँग भएको बहुपक्षीय पारमाणविक सम्झौताबाट भिन्न भएर तेहरानमाथि कडा प्रतिबन्ध लगाएयता तनाव बढ्दै गएको हो।
इरानले यसअघि आफ्नो हवाई क्षेत्रमा प्रवेश गरेको भन्दै अमेरिकी ड्रोनलाई स्ट्रेट अफ होर्मुजमै खसालेको थियो। तर, अमेरिकाले भने उक्त ड्रोन आक्रमणमा पर्दा इरानको हवाई क्षेत्रभन्दा बाहिर पर्ने समुद्री क्षेत्रमा रहेको बताउँदै आएको छ। (रासस/एएफपी)
