काठमाडौँ – सरकारले नेत्रविक्रम चन्द नेतृत्वको नेकपालाई आफूसँग भएका हातहतियार ३५ दिनभित्र बुझाउन समयसीमा दिएको छ।
सरकारका प्रवक्ता गोकुलप्रसाद बाँस्कोटाले मन्त्रिपरिषद्का पछिल्ला निर्णय सार्वजनिक गर्दै वार्ता र छलफलका लागि सरकार सदैव तयार रहेको स्पष्ट गरे। सो समूहले आपराधिक र हिंसात्मक गतिविधि गरेको भन्दै सरकारले उसका त्यस्ता गतिविधिलाई प्रतिबन्ध लगाउने निर्णय गरेको थियो।
सिंहदरबारस्थित मन्त्रालयमा आज (बिहीबार) आयोजित पत्रकार सम्मेलनमा मन्त्री बाँस्कोटाले भने, “यसका लागि रातो कार्पेट ओछ्याएरै बिन्ती गर्छौँ तर उहाँहरूको अडान हेर्दा त्यस्तो देखिएन र सरकार यो निर्णयमा पुगेको हो।”
उनले वार्ताका लागि पटक पटक तयार भए पनि वार्तामा नआएको सो समूहका गतिविधिलाई सरकारले सूक्ष्म रूपमा अध्ययन गरी त्यसका आधारमा पार्टीलाई नभई समूहका हिंसात्मक र सङ्गठित प्रकारका आपराधिक र संविधान विरीतका गतिविधिलाई प्रतिबन्ध लगाइएको स्पष्ट गरे।
प्रमुख प्रतिपक्षी दलले पनि सरकारको यो निर्णयलाई स्वागत गरिसकेका अवस्थामा सत्तारूढ पार्टीभित्र यसबारे छलफल भएको र थप छलफल हुने पनि जानकारी दिए। सो समूहले आज नेपाल बन्द आह्वान गरेको थियो।
एक प्रश्नका जवाफमा मन्त्री बाँस्कोटाले सरकार र चन्द्रकान्त (सीके) राउत नेतृत्वको स्वतन्त्र मधेस गठबन्धनसँग गरिएको सहमतिमा उल्लिखित जनअभिमतको विधि प्रयोग गरिने भनिनुको अर्थ निर्वाचनबाट जनताले अभिव्यक्त गर्ने मत भएको बताए। उनले भने, “राउत मूलधारमा आउनुभयो। सरकारले स्वागत गर्यो। भोलि विप्लव समूह पनि आएमा सरकारले स्वागत गर्छ।” (रासस)
