काठमाडौँ । रसुवा तथा त्रिशुली नदीमा आएको बाढीका कारण जलविद्युत् आयोजनाको सुरुङभित्र फसेका एक जना चिनियाँ नागरिकको ११ औँ दिनमा जीवितै उद्धार गरिएको छ। २१६ मेगावाट क्षमताको माथिल्लो त्रिशूली–१ जलविद्युत् आयोजनाको अडिट–४ टनेलबाट शनिबार ती नागरिकलाई उद्धार गरिएको हो।
नेपाली सेना र दक्षिण कोरियाको विपद् व्यवस्थापन विज्ञ टोलीको संयुक्त प्रयासमा केहीबेर अघि मात्रै सुरुङभित्रबाट ती चिनियाँ नागरिकलाई सकुशल बाहिर निकालिएको हो। विपद्को ११ औँ दिनसम्म जोखिमपूर्ण अवस्थामा सुरुङभित्रै अड्किएका उनलाई खोज तथा उद्धार टोलीले जीवितै बाहिर ल्याउन सफल भएको हो।
सुरुङबाट उद्धार गरिएका ती चिनियाँ नागरिकलाई तत्काल प्राथमिक उपचार र स्वास्थ्य परीक्षणका लागि नुवाकोटको त्रिशूलीस्थित नेपाली सेनाको मैबल (मैथिल) ब्यारेकमा ल्याइँदै छ।
बाढी प्रभावित क्षेत्रहरूमा अझै पनि धेरै व्यक्तिहरू बेपत्ता रहेकाले नेपाली सेना, नेपाल प्रहरी, सशस्त्र प्रहरी बल र अन्तर्राष्ट्रिय विज्ञ टोलीहरू खोजी तथा उद्धार कार्यमा निरन्तर परिचालन भइरहेका छन्।
