बुटवल । बाँकेको नेपालगन्ज उपमहानगरपालिका–११ त्रिभुवन चोकस्थित सदरलाइनमा रहेको एक किराना पसललाई ग्यास लुकाएको आरोपमा कारबाही गरिएको छ ।
शंकर दयाल बद्रीप्रसाद प्रोभिजन स्टोरलाई ग्यास लुकाएर उपभोक्तालाई बिक्री नगरेको भन्दै ५० हजार रुपैयाँ जरिवाना गरिएको हो ।
बाँकेका सहायक प्रमुख जिल्ला अधिकारी महेश कुमार गुरुङको नेतृत्वमा आइतबार गरिएको बजार अनुगमनका क्रममा उक्त पसलमा १३ वटा ग्यास सिलिन्डर लुकाएर राखेको भेटिएको थियो ।
सहायक प्रमुख जिल्ला अधिकारी गुरुङका अनुसार उपभोक्ताले ग्यास माग्न जाँदा पसल सञ्चालकले ‘ग्यास छैन’ भन्दै फर्काउने गरेको गुनासो प्राप्त भएपछि अनुगमन गरिएको थियो ।
