काठमाडौँ । संयुक्त राष्ट्रसंघको प्रधान कार्यालयमा आयोजित प्रहरी प्रमुखहरूको सम्मेलनमा नेपाल प्रहरीका महानिरीक्षक दानबहादुर कार्कीले सम्बोधन गरेका छन् ।
जुलाई ७ देखि सुरू भएको सम्मेलनलाई सम्बोधन गर्दै आईजीपी कार्कीले विश्वव्यापी शान्ति, सुरक्षा तथा कानुनको शासन सुदृढीकरणमा अन्तर्राष्ट्रिय प्रहरी सहकार्य अपरिहार्य रहेका बताए ।
पाँचौँ संयुक्त राष्ट्रसंघीय चिफ अफ पुलिस समिट अमेरिकास्थित युएन (संयुक्त राष्ट्रसङ्घ) को प्रधान कार्यालयमा भइरहेको छ । आईजीपी कार्कीले बदलिँदो विश्व सुरक्षा परिवेशसँगै साइबर अपराध, मानव बेचबिखन, अन्तरदेशीय सङ्गठित अपराध, आतङ्कवाद, आर्थिक अपराध तथा डिजिटल प्रविधिको दुरुपयोगबाट सिर्जित चुनौतीहरू कुनै एक राष्ट्रको प्रयासबाट मात्र समाधान नहुने बताए ।
उनले भने, ‘सूचना आदान–प्रदान, क्षमता अभिवृद्धि, संयुक्त तालिम तथा प्रविधिको प्रभावकारी उपयोगमार्फत अन्तर्राष्ट्रिय सहकार्यलाई अझ सुदृढ बनाउनुपर्ने देखिन्छ ।’ आईजीपी कार्कीले युएन मिसनहरूमा नेपाल प्रहरीले दशकौँदेखि व्यावसायिकता, निष्पक्षता र अनुशासनका साथ आफ्नो भूमिका निर्वाह गरेको बताए ।
उनले भने, ‘विश्व शान्ति स्थापनामा नेपालको प्रतिबद्धता निरन्तर रहने विश्वास व्यक्त गर्दछु ।’ महिला प्रहरीको सहभागिता वृद्धि, समुदाय–प्रहरी साझेदारी, मानवअधिकारको सम्मान तथा कानुनको शासनलाई केन्द्रमा राखेर आधुनिक प्रहरी सेवाको विकासमा नेपाल प्रहरी प्रतिबद्ध रहेको उनले बताए ।
उनले शान्ति र सुरक्षाका साझा चुनौतीहरूको प्रभावकारी समाधानका लागि सदस्य राष्ट्रहरूबिच विश्वास, समन्वय र साझेदारी अझ सुदृढ हुनुपर्ने उल्लेख गर्दै भने, ‘सुरक्षित, न्यायपूर्ण र शान्तिपूर्ण विश्व निर्माणमा सबै राष्ट्रहरू एकजुट भएर अघि बढ्न आह्वान गर्दछु ।’
