काठमाडौँ। गल्फ अफ ओमानमा अमेरिकी सेनाले गरेको आक्रमणमा तीन जना भारतीय नाविकको मृत्यु भएको छ। घटनामा जहाजमा रहेका अन्य २१ जना चालक दलका सदस्यलाई उद्धार गरिएको छ।
भारतीय सरकारका अनुसार पलाउ झण्डा बोकेको तेल ट्याङ्कर एमटी सेटेबेलो बुधबार अमेरिकी सेनाको आक्रमणमा परेको हो। जहाजमा रहेका २४ भारतीय चालक दलमध्ये तीन जनाको मृत्यु भएको पुष्टि गरिएको छ। अमेरिकी सेनाले उक्त जहाजले इरानबाट तेल ओसारपसार गर्ने प्रयास गरेको र अमेरिकी निर्देशन पालना नगरेको आरोप लगाएको छ। सेन्ट्रल कमान्डका अनुसार जहाजको इन्जिन रुममा प्रिसिजन मुनिसन प्रहार गरिएको थियो।
अमेरिकी पक्षका अनुसार जहाजले इरानविरुद्धको नाकाबन्दी उल्लङ्घन गर्दै निर्देशन अवज्ञा गरेपछि कारबाही गरिएको हो।
भारत सरकारले घटनाप्रति गहिरो दुःख व्यक्त गर्दै यसबारे अमेरिका समक्ष कूटनीतिक रूपमा आपत्ति जनाएको छ। नयाँ दिल्लीस्थित अमेरिकी मिशनका उपप्रमुखलाई समेत यस विषयमा बोलाइएको बताइएको छ। भारतले क्षेत्रीय समुद्री मार्गमा नागरिकहरूको सुरक्षालाई प्राथमिकतामा राख्नुपर्ने भन्दै यस्ता घटनाको अन्त्य गर्न आग्रह गरेको छ। गल्फ अफ ओमान र होर्मुज जलडमरूमध्य क्षेत्रमा पछिल्ला दिनहरूमा तनाव बढ्दै गएको छ। इरान र अमेरिकाबीचको विवादका कारण व्यापारिक जहाजहरू प्रभावित हुन थालेका छन्। यो घटनाले अन्तर्राष्ट्रिय समुद्री सुरक्षा र क्षेत्रीय राजनीतिक तनावबारे गम्भीर चिन्ता उत्पन्न गरेको छ। विज्ञहरूले यसले आगामी दिनमा थप कूटनीतिक तनाव बढाउन सक्ने चेतावनी दिएका छन्।
