काठमाडौं । नेपाल सरकारले महाराजगञ्जस्थित राष्ट्रिय प्रहरी प्रशिक्षण प्रतिष्ठान स्थानान्तरण नगर्ने निर्णय गरेपछि प्रहरी महानिरीक्षक (आईजीपी) दानबहादुर कार्कीले त्यसलाई “ऐतिहासिक उपलब्धि” का रूपमा स्वागत गरेका छन् ।
बिहीबार बसेको मन्त्रिपरिषद् बैठकले प्रतिष्ठानको ११४ रोपनी ३ आना क्षेत्रफलको जग्गा पूर्ववत् रूपमा प्रतिष्ठानकै स्वामित्वमा रहने निर्णय गरेको हो ।
यसअघि २०७५ भदौ २१ मा उक्त जग्गा राष्ट्रपति कार्यालय लाई दिने निर्णय गरिएको थियो। अहिले सरकारले सो निर्णय सच्याउँदै प्रतिष्ठानको स्वामित्व सुरक्षित गरेको छ।
सरकारको निर्णयपछि नेपाल प्रहरीका प्रमुख कार्कीले सामाजिक सञ्जालमार्फत प्रतिक्रिया दिँदै यस कदमले संगठनको संस्थागत सुदृढीकरणमा महत्वपूर्ण टेवा पुग्ने बताएका छन् ।
