काठमाडौं । नेपाल प्रहरीका एक वरिष्ठ सई निलम्बित भएका छन्। प्रहरी संगठनको प्रतिष्ठामा आँच पुग्ने गरी नक्कली अडियो तयार पारी सार्वजनिक गरेको आरोपमा मधेस प्रदेश प्रहरी मातहतको जिल्ला प्रहरी कार्यालय धनुषामा कार्यरत प्रहरी वरिष्ठ नायब निरीक्षक (सई) सागर शमशेर जबरा निलम्बित भएका हुन्।
मधेस प्रदेश प्रहरी कार्यालयले एक प्रेस विज्ञप्ती जारी गर्दै निलम्बित गरिएको जानकारी दिएको हो । जबराले एक व्यवसायीलाई फोनमार्फत काल्पनिक प्रसंग सिर्जना गरी अडियो सामग्री तयार पारेको र त्यसलाई सञ्चार माध्यममार्फत सार्वजनिक गराएको पाइएको छ। प्रारम्भिक छानबिनले संगठन तथा कार्यालय नेतृत्वलाई विवादित र बदनाम गराउने उद्देश्यले उक्त सामग्री निर्माण गरिएको संकेत गरेको जनाइएको छ।
सहायक प्रवक्ता तथा सूचना अधिकारी प्रहरी उपरीक्षक भेषराज रिजालका अनुसार प्रहरी नियमावली २०७१ (संशोधनसहित) अनुसारको आचारसंहिता उल्लंघन भएको निष्कर्ष निकाल्दै निलम्बन प्रक्रिया अघि बढाइएको हो। प्रहरीले कानुन विपरीत सामग्री उत्पादन गरी संगठनलाई नै कमजोर पार्ने उद्देश्यले गरिएको यस्तो गतिविधि अनुशासन विपरीत भएको उल्लेख गर्दै सम्बन्धित अधिकृतलाई कारबाहीको दायरामा ल्याइएको स्पष्ट पारेको छ। साथै, यस्ता भ्रामक तथा तथ्यहीन सामग्रीको प्रभावमा नपर्न आम नागरिक र सञ्चार माध्यमलाई आग्रह गरिएको छ।
