काठमाडौँ । लाल सागर क्षेत्रमा तैनाथ अमेरिकी नौसेनाको विमानवाहक जहाज युएसएस जेराल्ड आर। फोर्डमा आगलागी हुँदा दुई जना नौसैनिक घाइते भएका छन्। अमेरिकी नौसेनाका अनुसार जहाजभित्र रहेको लुगा धुने स्थानबाट आगलागी सुरु भएको थियो।
घटना मार्च १२ मा भएको बताउँदै अमेरिकी नौसेना केन्द्रीय कमाण्ड ले सामाजिक सञ्जालमार्फत जानकारी दिएको हो। कमाण्डका अनुसार आगलागी कुनै युद्ध वा बाह्य आक्रमणका कारण नभई प्राविधिक कारणले भएको हुनसक्ने र आगो तत्काल नियन्त्रणमा लिइएको छ। नौसेनाले जहाजको इन्जिन प्रणाली प्रोपल्सन प्लान्टमा कुनै क्षति नपुगेको र पोत पूर्ण रूपमा सञ्चालनमा रहेको जनाएको छ। घाइते दुई नौसैनिकको अवस्था स्थिर रहेको र उनीहरूको ज्यानलाई खतरा नभएको बताइएको छ। उनीहरू हाल उपचाररत रहेको र थप विवरण पछि सार्वजनिक गरिने जनाइएको छ। फोर्ड क्यारियर स्ट्राइक समूहले आफ्नो पछिल्लो मिसन गत जुन २४ मा भर्जिनिया बाट सुरु गरेको थियो। प्रारम्भमा यो टोली अमेरिकी युरोपेली कमाण्ड अन्तर्गत परिचालन गरिएको थियो।
पछि लागुऔषधविरुद्धको अभियानका लागि ल्याटिन अमेरिका र त्यसपछि इरान सँगको बढ्दो तनावपछि मध्यपूर्व क्षेत्रमा पठाइएको हो। अमेरिकी अनलाइन सञ्चारमाध्यम नेभी टाइम्सका अनुसार सोमबारसम्म यो जहाज लगातार २६१ दिनदेखि समुद्रमा रहेको छ। नौसेना कार्यसञ्चालनका उप–प्रमुख जेम्स किल्बी ले यो मिसन करिब ११ महिनासम्म लम्बिन सक्ने बताएका छन्, जुन अमेरिकी नौसेनाको इतिहासमै सबैभन्दा लामो समुद्री तैनाथीमध्ये एक हुन सक्छ। हालको अभियानका क्रममा जहाजले प्लम्बिङ अर्थात् पाइप तथा ढल प्रणालीसम्बन्धी समस्या पनि भोगिरहेको बताइएको छ। यसले जहाजमा रहेका करिब ६५० शौचालय प्रभावित भएका छन्। एनपिआर को रिपोर्टअनुसार जहाजको भ्याकुम फोहोर पानी सङ्कलन प्रणाली बारम्बार बिग्रने समस्या देखिएको छ। सन् २०२३ यता मर्मतका लागि ४२ पटक प्राविधिक टोली बोलाउनुपरेको र सन् २०२५ मा मात्र ३२ पटक यस्तो समस्या देखिएको बताइएको छ।
