काठमाडौँ । सामुदायिक जंगलमा मृत अवस्थामा भेटिएकी १६ वर्षीया इनिशा विकको घटनामा निष्पक्ष छानबिनको माग गर्दै सुर्खेतमा प्रदर्शन भएको छ। मृतकका आफन्त र अधिकारकर्मीहरूले ‘बालिकामाथि हुने बलात्कार, हत्या र हिंसा बन्द गर’, ‘इनिशालाई न्याय देऊ’, ‘हत्यारालाई कारबाही गर’ जस्ता नारासहित वीरेन्द्रनगरमा विरोध प्रदर्शन गरेका छन्।
शनिबार बिहान घरबाट निस्किएकी इनिशा अबेरसम्म घर नफर्किएपछि आफन्तले उनको खोजी गरेका थिए। त्यसै दिन बिहान ९ बजे वीरेन्द्रनगर–४ स्थित शहीद पार्क नजिकैको जनजागरण सामुदायिक वनमा उनी बेहोस अवस्थामा भेटिएकी थिइन्। घटनास्थलबाट प्रहरीले वीरेन्द्रनगर–९ का एक युवकलाई नियन्त्रणमा लिएको छ। मृतकका परिवारले इनिशामाथि बलात्कारपछि हत्या गरिएको दाबी गर्दै दोषीलाई कडा कारबाही र न्याय दिनुपर्ने माग राखेका छन्। जिल्ला प्रहरी कार्यालय सुर्खेतले घटनामा संलग्न भएको आशंकामा चार जनालाई थप नियन्त्रणमा लिएर अनुसन्धान गरिरहेको जनाएको छ। चिकित्सकीय रिपोर्ट अझै पर्खन बाँकी छ। इनिशा वीरेन्द्रनगर–६ स्थित उषा बालबाटिका विद्यालयमा कक्षा ११ मा अध्ययनरत थिइन्।
उनी शनिबार बिहान प्रयोगात्मक पाठ पढ्न घरबाट निस्किएकी थिइन्। बिहान ८ बजे घर फर्कने भनिए पनि ९ बजेसम्म नफर्किएपछि परिवारले खोजी सुरु गरेको थियो। केही समयपछि अपरिचित नम्बरबाट फोन आएर “तपाईंकी छोरी शहीद पार्कको जंगलमा बेहोस अवस्थामा छिन्” भन्ने जानकारी दिइएको थियो। घटनास्थलमा रक्ताम्मे शरीर, कपाल लुछिएको, घाँस मडारिएको, जुत्ता र मोजा फरक–फरक अवस्थामा भेटिएको देखेपछि आमाले आफैं शोक व्यक्त गरेकी छन्। परिवारले इनिशाको सामूहिक बलात्कारपछि हत्या भएको आशंका गरेका छन्। प्रहरीका अनुसार प्रारम्भिक अनुसन्धानले इनिशामाथि बलात्कारपछि मृत्यु भएको देखाएको छ। पक्राउ परेकाहरू सबै १८ वर्षमुनिका नाबालक हुन्। परिवारले दोषी कारबाही नभएसम्म न्याय नपाउने अडान लिएका छन्।
