काठमाडौँ । नेपाल शैक्षिक परामर्श संघ (इक्यान) को आगामी निर्वाचन २०८२ नजिकिँदै जाँदा संघभित्र अघिल्लो कार्यकालका पदाधिकारीहरूको भूमिकामाथि मूल्यांकन सुरु भएको छ।
यही क्रममा, इक्यानको आसन्न निर्वाचनमा सचिव पदका उम्मेदवारआशिक कार्कीले कोषाध्यक्षको रुपमानिर्वाह गरेको जिम्मेवारीबारे सदस्यहरूबीच चर्चा भइरहेको छ।
कोषाध्यक्षको जिम्मेवारी र आर्थिक व्यवस्थापन
इक्यान स्रोतका अनुसार आशिक कार्कीले कोषाध्यक्षको हैसियतमा संघको आर्थिक व्यवस्थापन, पारदर्शिता र सेवा प्रवाहमा ध्यान दिएका थिए। उनको कार्यकालमा वित्तीय प्रणालीलाई व्यवस्थित बनाउने प्रयास गरिएको र दैनिक कारोबारलाई डिजिटल माध्यममार्फत सहज बनाउने प्रक्रिया अघि बढाइएको जनाइएको छ।
सदस्य लक्षित क्षमता अभिवृद्धि कार्यक्रम
संघका अनुसार कार्कीको कार्यकालमा व्यवसायी सदस्यहरूको दक्षता अभिवृद्धिका लागि करसम्बन्धी सचेतना कार्यक्रम सञ्चालन गरिएको थियो। देशका विभिन्न स्थानमा आयोजना गरिएका ‘ट्याक्स ट्रेनिङ’ कार्यक्रममार्फत सदस्यहरूलाई कर प्रणालीप्रति जानकारी गराउने उद्देश्य राखिएको थियो।
सेवा विकेन्द्रीकरणका पहल
काठमाडौँ केन्द्रित सेवाका कारण मोफसल क्षेत्रका सदस्यहरूले भोग्दै आएको कठिनाइलाई मध्यनजर गर्दै ODMB प्रणालीमार्फत जापान, बेलायत र अष्ट्रेलियासम्बन्धी बायोमेट्रिक सेवा काठमाडौं बाहिर विस्तार गर्ने पहल गरिएको संघले जनाएको छ। यसबाट सेवा पहुँचमा केही सहजता आएको बताइन्छ।
कोभिडकालीन निरन्तरता र डिजिटल सुधार
कोभिड–१९ महामारीको अवधिमा पनि संघको वित्तीय तथा प्रशासनिक गतिविधि निरन्तर राख्ने प्रयास गरिएको र सो समयमा चार हजार एक सयभन्दा बढी जापान भिसा प्रक्रिया सम्पन्न भएको विवरण संघको आन्तरिक अभिलेखमा उल्लेख छ। साथै, संस्थाको डिजिटल प्रणालीलाई थप व्यवस्थित बनाउने काम पनि सोही अवधिमा अघि बढाइएको जनाइएको छ।
इक्यान निर्वाचन २०८२ लाई संघको आगामी कार्यदिशा, आर्थिक पारदर्शिता र संस्थागत स्थायित्वसँग जोडिएको महत्वपूर्ण प्रक्रिया मानिएको छ। सदस्यहरूका अनुसार उम्मेदवारहरूको अघिल्लो कार्यसम्पादन र जिम्मेवारी निर्वाह आगामी निर्वाचनमा प्रमुख आधार बन्ने देखिएको छ।
