विराटनगर - प्रदेश नम्बर १ को राजधानी र नामको विषयमा घनीभूत छलफल चलिरहँदा धरानलाई प्रदेश राजधानी घोषणा गर्न माग गर्दै विराटनगरमा सिठी जुलुस निकालिएको छ।
धरानलाई प्रदेश १ को स्थायी राजधानी तोक्न माग गर्दै धरानबासीले विराटनगर स्थित प्रदेशसभा भवन अगाडि सिठी जुलुस निकालेका हुन्। धरानबाट आएका धरानवासी राजधानीका लागि खबरदारी गर्दे प्रदर्शन गरेका छन्।
सबै राजनीतिक दलको अगुवाइमा धरानबाट आएका विभिन्न दलका कार्यकर्ता र संघसंस्थाका प्रतिनिधि प्रदर्शनमा सहभागि थिए। प्रदेश नम्बर १ को राजधानी र प्रदेशको नामाकरणको बहस टुङ्गोमा पुग्नै लाग्दा धरानले राजधानीको माग गर्दै चरणवद्ध आन्दोलनको शुरुआत गरेको छ।
धरान उपमहानगरपालिकाको कार्यालयमा सम्पन्न विभिन्न राजनीतिक दलको बैठकले निर्णायक आन्दोलनको घोषणा गर्ने निर्णय गरेको छ। विभिन्न दलहरुका प्रतिनिधीले प्रदेशको राजधानी धरानलाई बनाउन संघर्षका चरणवद्ध बुँदाहरु प्रस्ताव गरेका थिए।
प्रतिनिधीहरुले राखेको प्रस्ताव माथि छलफल गर्दै धरान उपमहानगरपालिकाले धरान क्षेत्रबाट विजयी भएका प्रदेशका मुख्य ओहोदामा पुगेका प्रतिनिधीहरुलाई ज्ञापन पत्रसहित धरान उपयुक्तताको आधारहरु पेश गर्ने कार्यक्रम तय गरेका छन्।
धरानले स्थायी राजधानी बनाउनका लागि धरान सभागृह भवनसहित त्यसले ओगटेको जमिन र धरान उपमहानगरपालिकाकै नाममा २५ विघा क्षेत्रफल रहेको जमिन समेत उपलब्ध गराउने जानकारी गराईसकेको जनाएको छ।
धरान पहाड र तराईको संगमस्थलको रुपमा रहेकाले प्रदेशको प्रशासनिक कार्य सम्पादन गर्न सहज हुने भएकाले पनि धरानमा राजधानी बनाउन उपयुक्त रहेको धरानवासीको ठम्याई छ। प्रदेशसभामा राजधानी प्रस्ताव दर्ता गर्ने दिन आइतबार धरानबाट गाडी रिजर्भ गरी आन्दोलन गर्न विराटनगर आएका हुन्।
