‘अत्यावश्यक सेवा दिँदा पनि प्रहरीको हस्तक्षेप’

पब्लिक अपडेट

गृहपृष्ठ
पब्लिक अपडेट

नेपाली पब्लिक शुक्रबार, भदौ १२, २०७७

काठमाडौं– नेपाल प्रहरीले आज उपत्यकामा अत्यावश्यक खाद्यान्न डेलिभरी गर्दै आएका व्यक्ति र ई–कमर्सका सञ्चालकलाई पक्राउ गरेको छ ।

अत्यावश्यक सेवा दिँदा हस्तक्षेप गरिएको भन्दै फुड डेलिभरी र ई–कमर्स सञ्चालकले असन्तुष्टि जनाएका छन् । युजी केक्स् केक बेकरी सञ्चालिका निकिता आचार्य भन्छिन्, ‘अत्यावश्यक सेवा दिँदा पनि प्रहरीले बिनासूचना अपराधीलाई जस्तो गरी पक्राउ गर्‍यो । लकडाउन सुरु भएको एक हप्ता भइसक्दा केही गरेन । केही गर्नै परे पनि सूचना दिनुपर्ने हो ।’

निकिता आचार्य, सिइओ, युजी केक्स्

उनले आफू पक्राउ पर्दा कार्यालयमा भीडभाड नभएको बताइन् । उनले भनिन्, ‘सबै नियम पालना गरेरै काम गरेका थियौं, यसभन्दा पहिलेको लकडाउनमा पनि यसरी नै काम गरेका हाै । तर यसपटक प्रहरीले बिनासूचना पक्राउ गर्‍यो, जुन तरिका भएन ।’

त्यस्तै, फुडमान्डुका सञ्चालक मनोहर अधिकारीलाई प्रहरी कार्यालयमा बोलाइएको थियो । उनी प्रहरी कार्यालय पुगे तर उनलाई यसबारे कुनै जानकारी दिइएन । उनले भने, ‘पहिलो पटकको लकडाउनमा पनि यसरी नै काम गरेका हौं । यसपटक प्रहरीले किन हाम्रो काममाथि हस्तक्षेप गर्‍यो, बुझ्न सकेको छैन ।’

मनोहर अधिकारी, संस्थापक, फुडमाण्डु

अधिकारीले फुड डेलिभरी गर्दै हिँडेका साथीलाई प्रहरीबाट बीच सडकमै रोकिएको जानकारी दिए । प्रहरीले उपत्यकाका युजी केक, फुडमान्डु, फुडमारियो तथा भोजडिलका राइडर तथा सञ्चालकलाई पक्राउ गरेको हो ।

फुड डेलिभरी गर्नेलाई किन बिनासूचना पक्राउ गरिएको भन्ने नेपाली पब्लिकको जिज्ञासामा काठमाडाै‌ प्रमुख जिल्ला अधिकारी जनकराज दाहालले निषेधाज्ञा उल्लंघन गर्नेलाई कारबाही गरिएको जानकारी दिए । उनले भने, ‘अत्यावश्क सामग्रीभित्र होम डेलिभरी, फुड डेलिभरी जस्ता कुनै पनि कामलाई सरकारले सञ्चालन गर्न दिने भनेको छैन ।’