काठमाडौँ । सरकारले शुक्रबार नेपाल प्रहरीको नयाँ महानिरीक्षक नियुक्त गर्ने तयारी गरेको छ। उच्च राजनीतिक स्रोतका अनुसार प्रहरी प्रमुखमा एआईजी चन्द्र कुवेर खापुङलाई नियुक्त गर्ने निर्णयमा सरकार पुगेको छ।
जेष्ठता र वरिष्ठताका आधारमा खापुङ प्रहरी नेतृत्वका लागि एकल दाबेदार मानिन्छन्। हाल उनी नेपाल प्रहरीको केन्द्रीय अनुसन्धान ब्युरो (सीआईबी) का प्रमुख रहेका छन्। खापुङले करिब साढे दुई महिना प्रहरीको नेतृत्व सम्हाल्नेछन्। त्यसपछि एआईजी दानबहादुर कार्की र राजन अधिकारीमध्ये एक जना आईजीपी बन्ने अपेक्षा गरिएको छ।
शुक्रबार बिहान बस्ने मन्त्रिपरिषद् बैठकले भदौ १९ गतेदेखि लागू हुने गरी खापुङलाई प्रहरी प्रमुख नियुक्त गर्ने निर्णय लिने तयारी भएको प्रधानमन्त्री निकट स्रोतले जनाएको छ।
नेपाल प्रहरीका वर्तमान महानिरीक्षक दीपक थापा भने आगामी भदौ १८ गते अनिवार्य अवकाशमा जाँदैछन्। ३० वर्षे सेवा अवधि पूरा गर्दै थापा अवकाशमा जान लागेपनि पदावधि थपका लागि उनी स्वयं र सरकारसँग निकट सम्बन्ध भएका केही व्यापारी सक्रिय भएको चर्चा थियो।
तर, यसअघि नियमावली संशोधन गरी थापाको कार्यकाल थप्ने कुरा भएपनि प्रधानमन्त्री केपी शर्मा ओली जेष्ठता र वरिष्ठता अनुसार महानिरीक्षक नियुक्त गर्ने निर्णयमा पुगेको स्रोतले जनाएको छ ।
