काठमाडौं — पूर्वखेलकुदमन्त्री एवं राष्ट्रिय स्वतन्त्र पार्टीका सांसद विराजभक्त श्रेष्ठले खेलकुद क्षेत्रलाई राजनीतिबाट मुक्त राख्न आग्रह गरेका छन्। सांसद श्रेष्ठले खेलाडीहरूको सम्मानमाथि खेलबाड नगर्न र खेलकुदमा फोहोरी राजनीति बन्द गर्न सरकारलाई चेतावनी दिएका छन्।
संगिना वैद्यको राजीनामा लज्जास्पद घटना
श्रेष्ठले सन् २००४ को ग्रिस ओलम्पिकमा छनोट चरण पार गर्दै ओलम्पिक खेल्ने पहिलो नेपाली महिला खेलाडी संगिना वैद्यलाई निर्देशक पदमा बढुवा गर्नुपर्नेमा, मन्त्रीको ठाडो हस्तक्षेपले पार्टीका क्याडरलाई नियुक्त गरेको विषयमा असन्तुष्टि जनाए। संगिनालाई निर्देशक पद नदिई तल्लो वरीयताका सोभितराज प्रसाईंलाई नियुक्त गरेपछि उनले राजीनामा दिनुपरेको घटनालाई सांसद श्रेष्ठले "गम्भीर र लज्जास्पद" भनेका छन्।
राजनीतिक हस्तक्षेपको आलोचना
खेलकुदमन्त्री तेजुलाल चौधरीको हस्तक्षेपप्रति कडा आलोचना गर्दै सांसद श्रेष्ठले यो कदमलाई कानुनको उल्लंघन र खेलकुद क्षेत्रको अपमान भएको बताएका छन्। उनले संसद्मा बोल्दै भने, "अब खेलाडीले राष्ट्रको झन्डा नभई पार्टीको झन्डा बोकेर खेल्नुपर्ने हो?"
यो घटनाले खेलकुद क्षेत्रमा राजनीतिक हस्तक्षेपप्रति गम्भीर प्रश्न उठाएको छ, जसमा सांसद श्रेष्ठले सरकारलाई खेलाडीहरूको सम्मान सुरक्षित गर्न आग्रह गरेका छन्।
