कमरेड! जन्मदिनको शुभकामना

साहित्य

गृहपृष्ठ
साहित्य

नेपाली पब्लिक शनिबार, माघ १२, २०७५

ओमप्रकाश घिमिरे

हजुर जन्मनुभन्दा पनि हजुरले जन्माउन खोजेका बिहानी साँच्चिकै सुन्दर थियो कमरेड जन्मदिनको शुभकामना! हजुर जन्मनुमा हामीलाई साँच्चिकै गौरव छ, आज आक्रोश त यसमा छ कि, हजुरसँगै किन जन्मन सकेन त्यो घाम? हजुरसँगै किन फक्रनै नसकेको त्यो फूल? किन हजुरजस्तै बङ्गलामा नबसेको मानवीरे दमाइँ किन ठेकेदार बन्न नसकेको सङ्ग्रामे सार्की किन सुमार्गी नबनेर विदेश हिँडेको कमरेड लालध्वज? यी सब समयलाई चिन्न नसकेका नामर्दहरू हुन् कमरेड वीर त हजुर हुनुहुन्छ नायक त हजुर नै हो समयको कमरेड ढिलै भए पनि जन्मदिनको शुभकामना! कमरेडको मुहारमा यतिबेला कम्ता चमक देखिन्छ! कसले भन्नसक्छ यो बेला कमरेड हजुरको जन्म त गणतन्त्रसँगै भएको हो नि किन यति धेरै कुरूप देखिनु भएको? ऐँजेरूले जेलिएको निबुवाजस्तो हजुरको शरीर किन यस्तो रोगी? रुढी र ढोगीहरूको सयनकक्षमा हजुर किन अल्मलिनु भएको? यी प्रश्न बेकार छैनन् र कमरेड? कमरेड जन्मदिनको शुभकामना! असङ्ख्य पीडा, अनगन्ती भोक र कठोर परिश्रमले आफू जन्मेको वर्ष गते र बार बिर्सिएकाहरूलाई पनि याद छ कमरेड प्रजातन्त्र, लोकतन्त्र र गणतन्त्र दिवस र, कमरेडको जन्मदिन। जसरी हिजो याद हुन्थ्यो पञ्चायती दिवस, पृथ्वी जयन्ती र महाराजको जन्मदिन! कमरेड जन्मदिनको शुभकामना!!!